Háskólar í hættu - Hver er framtíð háskólanna?
Stúdentaráð Háskóla Íslands, Stúdentafélag Háskólans í Reykjavík og Félag Stúdenta við Háskólann á Akureyri stóðu fyrir opnum fundi um undirfjármögnun háskólanna mánudaginn 17. október 2016 á Háskólatorgi. Fundinum var einnig streymt á netinu.
Meðalframlag íslenska ríkisins á hvern ársnema í háskóla er tæplega 1,3 milljónir króna. Ísland er þar langt á eftir nágrannaþjóðum sínum því framlagið nemur rúmlega 2,2 milljónum króna að meðaltali annars staðar á Norðurlöndum.
Í aðgerðaáætlun Vísinda- og tækniráðs er markmiðið að styrkja fjármögnun háskólakerfisins hér á landi svo hún verði að minnsta kosti sambærileg við meðaltal annarra norrænna ríkja árið 2020. Ríkisfjármálaáætlun fyrir árin 2017-2021 sýnir hins vegar að engan veginn er komið til móts við ofangreint markmið.
Viðvarandi undirfjármögnun háskólanna dregur úr framþróun í samfélaginu og samkeppnishæfni landsins. Enn fremur er ljóst að ef ekki er lagt meira fé til reksturs háskólakerfisins þarf á endanum að fækka nemendum og draga úr fjölbreytileika í námsframboði.
Frambjóðendur úr öllum flokkum sem myndu ná þingmanni inn samkvæmt nýjustu skoðanakönnunum voru fengnir til þess að ræða málin.
Í pallborði sátu:
Björt Framtíð - Eva Einarsdóttir, 2. sæti í Reykjavík Suður
Framsókn - Lilja Dögg Alfreðsdóttir, 1. sæti í Reykjavík Suður
Píratar - Björn Leví Gunnarsson, 2. sæti í Reykjavík Norður
Samfylking - Sigríður Ingibjörg Ingadóttir, 1. sæti í Reykjavík Norður
Sjálfstæðisflokkur - Bjarni Benediktsson, 1. sæti í Suðvestur
Viðreisn - Þorgerður Katrín Gunnarsdóttir, 1. sæti í Suðvestur
Vinstri græn - Svandís Svavarsdóttir, 1. sæti í Reykjavík Suður
Tekið var við spurningum úr sal að loknum stuttum erindum fulltrúa stjórnmálaflokkanna.
Fundarstjóri var Ragna Árnadóttir, aðstoðarforstjóri Landsvirkjunar og meðlimur í Háskólaráði Háskóla Íslands.