Doktorsvörn - Ari Páll Kristinsson 22. maí 2009
Doktorsvörn Ari Páll Kristinsson 22.5.2009.
Ari Páll Kristinsson lagði fram til doktorsprófs í íslenskri málfræði ritgerðina „„Í fréttum er þetta helst.“ Rannsókn á einkennum íslensks útvarpsmáls“ við Íslensku- og menningardeild 22. maí 2009. Í ritgerðinni er sagt frá rannsókn sem stefndi að því að leggja drög að lýsingu á málsniðum tveggja textategunda í íslensku útvarpi: útvarpsfrétta og dægurmálaefnis. Með hliðsjón af vísbendingum um ólík einkenni ritaðra og talaðra texta er í rannsókninni m.a. hugað að áhrifum þess að nota skrifað handrit frá orði til orðs. Vikið er að hinum sérstöku málaðstæðum í útvarpi og að þeirri spurningu hvort útvarpsmál geti haft áhrif á aðra málnotkun. Fjallað er um breytileika í íslenskri málnotkun á ýmsum sviðum og er m.a. gerð grein fyrir áhrifum málræktarviðhorfa í því sambandi. Fræðihugtök eins og málsnið, málsamfélag o.fl. eru afmörkuð og þeim beitt í umfjöllun um hið íslenska efni. Spurningin um eðli og orsakir breytilegrar málnotkunar eftir aðstæðum er sett í fræðilegt samhengi kenninga í félagsmálvísindum.
Aðalleiðbeinandi var Kristján Árnason prófessor í íslenskri málfræði. Í doktorsnefnd voru einnig Eiríkur Rögnvaldsson prófessor og Höskuldur Þráinsson prófessor.
Andmælendur eru Veturliði G. Óskarsson prófessor við Háskóla Íslands og Helge Sandøy prófessor við Háskólann í Bergen.
Ari Páll Kristinsson er með BA-próf í íslensku og almennum málvísindum (1982) og cand. mag.-próf í íslenskri málfræði (1987), auk prófs í uppeldis- og kennslufræði til kennsluréttinda (1987). Auk starfa og náms á Íslandi hefur hann stundað nám og rannsóknir við Háskólann í Ósló, sumarskóla Linguistic Society of America og University of York.
Hann er nú rannsóknardósent og stofustjóri málræktarsviðs hjá Stofnun Árna Magnússonar í íslenskum fræðum.
Eiginkona Ara Páls er Sigrún Þorgeirsdóttir, ritstjóri hjá Þýðingamiðstöð utanríkisráðuneytisins. Börn þeirra eru Þorgeir, Kristrún, Ingólfur og Hannes.