Doktorsvörn Fern Nevjinsky 11.09.2009
Doktorsvörn í íslenskum bókmenntun – Fern Nevjinsky – 11. september 2009 – Sameiginleg gráða með Université Paris IV – Sorbonne
Fern Nevjinsky varði doktorsritgerð sína, Þrá og ástríða í leikverkum Jóhanns Sigurjónssonar (Désir et passion dans l’œuvre dramatique de Jóhann Sigurjónsson) við Íslensku- og menningardeild Háskóla Íslands 11. september 2009. Eiríkur Rögnvaldsson, forseti deildarinnar, stýrði athöfninni í Hátíðasal skólans.
Doktorsritgerðin var lögð fram samtímis við Háskóla Íslands og Université Paris IV – Sorbonne samkvæmt samstarfssamningi skólanna frá 2003. Hún er rituð á frönsku en henni fylgir ítarlegt ágrip á íslensku og veita skólarnir gráðuna sameiginlega.
Andmælendur voru Camille Dumoulié, prófessor við Université Paris XIII – Nanterre, og Sveinn Yngvi Egilsson, prófessor við Háskóla Íslands. Heiðursandmælandi var Sveinn Einarsson, leikhúsfræðingur og fyrrverandi Þjóðleikhússtjóri.
Leiðbeinendur voru prófessor Torfi H. Tulinius (Háskóla Íslands) og prófessor Marc Auchet (Université Paris IV-Sorbonne).
Doktorsritgerðin er byggð á ítarlegri greiningu á leikverkum Jóhanns Sigurjónssonar með aðferðum sálgreiningar. Megintilgáta doktorsefnisins er sú að persónur Jóhanns láti þrár sínar leiða sig út í ástríður sem valda andlegu hruni með allsherjar afturhvarfi til frumstiga sálarlífsins. Með aðferðum bókmenntafræðinnar og skírskotun til ýmissa sálgreinenda er farið í gegnum öll leikrit Jóhanns með þróun persónanna í huga, ekki síst Galdra-Lofts.