Doktorsvörn - Anna-Karin Eriksson 8. janúar 2010
Föstudaginn 8. janúar 2010 fór fram doktorsvörn við Raunvísindadeild Háskóla Íslands. Þá varði Anna-Karin Eriksson doktorsritgerð sína „Hydrogen uptake in low-dimensional structures“. Andmælendur voru dr. Bernard Dam, prófessor við Delft University of Technology, og dr. Hannes Jónsson, prófessor við Raunvísindadeild Háskóla Íslands. Leiðbeinendur í verkefninu voru dr. Sveinn Ólafsson, vísindamaður við Raunvísindastofnun Háskóla Íslands, og Björgvin Hjörvarsson, prófessor við Uppsalaháskóla í Svíþjóð.
Dr. Guðmundur G. Haraldsson, forseti Raunvísindadeildar, stjórnaði athöfninni sem fór fram í Öskju.
Áhrif jaðarskilyrða á vetnisupptöku í lág-víddar efniseiningum voru rannsökuð. Niðurstöður rannsóknanna sýna fram að örtækniaðferðir (nanotechnology) geta nýst við að stýra efniseiginleikum vanadíns og magnesín til geymslu á vetni sem orkubera. Sýnt er fram á að í Mg:C örbyggingum lækkar bindiorka vetnisins það mikið að vetnisgeymsla verði möguleg á við lægra hitastigbil en er mögulegt með hreinu magnesín. Rannsóknirnar fóru fram á Íslandi og Uppsölum í Svíþjóð og voru styrktar af markáætlun í örtækni (Rannsóknamiðstöð Íslands), Rannsóknasjóði Háskóla Íslands og Nordic Centre of Excellence on Hydrogen Storage Materials sem er rannsóknanetverk á vegum Norræna orkusjóðsins.
Í doktorsnefnd sátu leiðbeinendur verkefnisins ásamt Hafliða P. Gíslasyni, prófessor við Raunvísindadeild Háskóla Íslands.
Anna-Karin Eriksson er fædd í Nörrköping í Svíþjóð 21. september árið 1977. Anna-Karin lauk Civ.Ing.-námi í materialfysik frá Uppsalaháskóla í Svíþjóð vorið 2004 og hóf doktorsnám sitt við HÍ í lok árs 2004. Anna-Karin er í sambúð með Árna Sigurði Ingasyni doktorsnema og eiga þau saman einn son. Að auki er von á fjölgun í fjölskyldunni í lok febrúar.