Doktorsvörn HÍ - Hanna Sisko Kaasalainen
Doktorsvörn í jarðefnafræði – Hanna S. Kaasalainen – 30. mars 2012 –
Hanna S. Kaasalainen varði doktorsritgerð sína „Efnafræði málma og brennisteins í jarðhitavökva á Íslandi“ við Jarðvísindadeild Háskóla Íslands 30. mars 2012 í Hátíðasal skólans. Magnús Tumi Guðmundsson prófessor, forseti Jarðvísindadeildar, stýrði athöfninni.
Andmælendur voru D. Kirk Nordstrom, sérfræðingur við U.S. Geological Survey í Boulder í Bandaríkjunum, og Anthony E. Williams-Jones, prófessor við Earth and Planetary Sciences við McGill University í Montreal í Kanada.
Leiðbeinandi Hönnu var Andri Stefánsson, prófessor í jarðefnafræði við Jarðvísindastofnun Háskóla Íslands, og í doktorsnefndinni voru ennfremur Stefán Arnórsson, prófessor í jarðefnafræði við Jarðvísindadeild, og Jón Ólafsson, prófessor í haffræði við Jarðvísindadeild.
Ritgerð Hönnu fjallar um efnafræði brennisteins og snefilefna í jarðhitavatni á Íslandi. Þróaðar voru aðferðir til að mæla algeng efnasambönd brennisteins í jarðhitavatni þar með talið brennisteinsvetni (H2S), súlfat (SO4), súlfít (SO3), þíósúlfat (S2O3) og pólíþíónöt (SnO6). Niðurstöðurnar sýna að H2S og SO4 eru ríkjandi efnasambönd í jarðhitavatni sem safnað var úr borholum og hefur ekki komist í snertingu við súrefni. Samfara oxun myndast jafnframt önnur efnasambönd brennisteins og má þar helst nefna þíósúlfat. Til að skilja efnafræði brennisteins betur var oxunarhraði brennisteinsvetnis í vatnslausn mældur. Niðurstöðurnar sýna að efnaferlið er flókið þar sem breytur eins og pH gegna mikilvægu hlutverki. Auk brennisteins var efnafræði ýmissa snefilefna í jarðhitavatni á Íslandi rannsökuð.