Thamar M Heijstra - doktorsvörn - Félagsvísindasvið
Doktorsvörn í félagsfræði – Thamar Melanie Heijstra – 7. júní 2013 –
Thamar Melanie Heijstra varði doktorsritgerð sína, Í leit að jafnvægi. Rannsókn á stöðu kynjanna í íslensku háskólasamfélagi (Seeking balance. A study of gendered life in Icelandic academia) við Félags- og mannvísindadeild Háskóla Íslands 7. júní 2013. Terry Gunnell, varaforseti deildarinnar, stjórnaði athöfninni í Hátíðasal skólans.
Andmælendur voru Tómas B. Bjarnason, doktor í félagsfræði, og Linda McKie, prófessor við School of Applied Social Sciences við Durham University í Bretlandi.
Leiðbeinandi var Guðbjörg Linda Rafnsdóttir, prófessor í félagsfræði, og aðrir í doktorsnefnd voru Þóroddur Bjarnason, prófessor við Hug- og félagsvísindasvið Háskólans á Akureyri, og Pat O’Connor, prófessor við Háskólann í Limerick á Írlandi.
Doktorsrannsóknin snerist um að skoða samspil fjölskyldu- og atvinnulífs íslenskra háskólakennara og hvort upplýsinga- og samskiptatækni og sveigjanlegur vinnutími auðveldi það. Einnig var skoðað hvers vegna færri konur gegna prófessorsstöðu en karlar og hvaða skoðun háskólakennarar sjálfir hafa á því. Niðurstöðurnar sýna að háskólakennarar eru bæði hlynntir sveigjanlegum vinnutíma og upplýsinga- og samskiptatækni. Engu að síður hafa þessi atriði ekki endilega orðið til þess að auðvelda samspil fjölskyldu- og atvinnulífs, þar sem vinnan nær tökum á heimilinu. Konur eru líklegri til að nota sveigjanleikann til að sinna fjölskyldunni en karlar. Að því leyti viðhalda sveigjanlegur vinnutími og upplýsingatækni hefðbundnum kynhlutverkum. Karlar og konur útskýra minnihluta kvenna í prófessorstöðum á ólíkan hátt og þótt fjölskylduþættir hafi ekki marktæk áhrif í rannsókninni er þessi skýring samt tíð meðal þátttakenda til að skýra muninn. Niðurstöður gefa til kynna að enn þá megi gera betur í jafnréttismálum, bæði innan heimilis og háskólasamfélags.
Rannsóknin var styrkt af Rannsóknarsjóði Háskóla Íslands.