Doktorsvörn - Ivan Savenko
Doktorsvörn í eðlisfræði – Ivan Savenko – 18. júní 2013 –
Ivan Savenko varði doktorsritgerð sína „Sterk víxlverkun milli ljóss og efnis í kerfum af mismunandi víddum“ (Strong light-matter coupling in systems of different dimensionality) við Raunvísindadeild Háskóla Íslands 18. júní 2013. Hafliði Pétur Gíslason, forseti deildarinnar, stýrði athöfninni í Hátíðasal skólans.
Andmælendur voru Mikhail Glazov, vísindamaður við Ioffe eðlisfræði- og tæknistofnun rússnesku vísindaakademíunnar í Pétursborg í Rússlandi, og Guillaume Malpuech, varadeildarforseti við Photon-deild Pascal-stofnunarinnar (sem áður nefndist LASMEA) í Frakklandi.
Leiðbeinandi og umsjónarkennari var Ivan Shelykh, prófessor í eðlisfræði við Raunvísindadeild. Aðrir í doktorsnefnd voru Viðar Guðmundsson og Snorri Þ. Ingvarsson, báðir einnig prófessorar við deildina.
Í doktorsverkefninu var gerð fræðileg rannsókn á nokkrum sviðum ljósskautseindaeðlisfræði. Þær eru:
1. Lýsing á slökunarhreyfifræði ljósskautseinda í raunrúmi og rauntíma með notkun formalismaþéttleikafylkis.
2. Rannsókn á ólínulegum áhrifum í terahertsgeislun örgeislahola.
3. Rannsókn á geislarófi skammtadepils (e. quantum dot) með brotna speglunarsamhverfu í einsháttar geislaholi.
4. Rannsókn á víxlverkun milli plasmónurisaómunar (e. giant plasmonic resonance) málmþyrpingar og geislaháttar geislahols.
Hægt er að beita þéttleikafylkisaðferðinni á einvíddar- og tvívíddarkerfi en skammtadeplar og -þyrpingar svara til núllvíddarkerfa, þannig að þrí-, tví- og núllvíddarkerfi eru innan ramma þessarar ritgerðar.