Samstarfssamningur við Tianjin-háskóla í Kína
Kristín Ingólfsdóttir, rektor Háskóla Íslands, og Liu Jianping, formaður háskólaráðs Tianjin-háskóla í Kína, undirrituðu samning um samstarf sem gerir nemendum beggja skóla kleift að sækja skiptinám við hinn skólann. Alls hefur Háskóli Íslands nú gert samninga við þrettán kínverska skóla.
Fjögurra manna sendinefnd á vegum Tianjin kom hér til lands og kynnti sér starfsemi Háskóla Íslands, þar á meðal kínverskukennslu í skólanum og Konfúsíusarstofnunina Norðurljós, sem starfrækt er við skólann, Stofnun Vigdísar Finnbogadóttur og starfsemi tengda jarðvísindum og verkfræði.
Í framhaldinu var ritað undir áðurnefndan samstarfssamning sem veitir nemendum við öll fræðasvið Háskóla Íslands tækifæri til að taka hluta af námi sínu við Tianjin-háskóla.
Tianjin-háskóli var stofnaður árið 1895, þá undir öðru nafni, og telst vera elsti háskóli Kína. Við skólann eru starfræktar 19 deildir sem bjóða upp á samtals tæplega 120 námsleiðir í grunn- og framhaldsnámi en nú stunda um 29 þúsund nemendur nám við skólann.