Irina Bokova, aðalframkvæmdastjóri UNESCO
Fyrirlestur Irinu Bokova, aðalframkvæmdastjóra UNESCO, 26. maí 2014 –
Irina Bokova, aðalframkvæmdastjóri UNESCO, hélt opinn fyrirlestur í Hátíðasal Háskóla Íslands mánudaginn 26. maí 2014. Fyrirlesturinn nefndi hún: Frá tungumáli til þekkingar. Hvernig megnum við að endurnýja hina endanlegu auðlind? Í fyrirlestri sínum beindi Bokova sjónum að því áhrifavaldi er felst í hlutverki og umboði UNESCO við nýtingu menningarverðmæta og vísindalegrar þekkingar í þágu varanlegs friðar og sjálfbærrar þróunar.
Kristín Ingólfsdóttir, rektor Háskóla Íslands, ávarpaði gesti í upphafi samkomunnar og stýrði umræðum.
Irina Bokova kom hingað til lands í boði utanríkisráðherra. Fyrirlesturinn var haldinn á vegum Háskóla Íslands og fór fram á ensku.
Irina Bokova var kjörin aðalframkvæmdastjóri UNESCO árið 2009, fyrst kvenna. Hún er fædd 12. júlí 1952 í Búlgaríu og er með meistaragráðu í alþjóðasamskiptum frá Moscow State Institute of International Relations en hefur einnig stundað nám við Maryland-háskóla og Harvard-háskóla í Bandaríkjunum. Bokova hefur mikla reynslu af störfum í utanríkisþjónustu Búlgaríu og gegndi um skeið bæði starfi utanríkisráðherra og varautanríkisráðherra landsins. Þá hefur hún einnig setið á búlgarska þinginu en starfaði sem sendiherra, m.a. gagnvart UNESCO, áður en hún tók við starfi aðalframkvæmdastjóra stofnunarinnar.