Vísindi á mannamáli - Gunnar Þór Hallgrímsson
Gunnar Þór Hallgrímsson, dósent í dýrafræði við Líf- og umhverfisvísindadeild Háskóla Íslands, fjallaði um rannsóknir á veirum í farfuglum sem koma hingað til lands í sjötta erindi fyrirlestraraðarinnar Vísindi á mannamáli í Háskóla Íslands.
Í erindinu fjallaði Gunnar Þór um rannsóknir sínar og samstarfsfélaga sem á síðustu árum hafa skoðað tíðni og gerðir fuglaflensuveira í fuglum á Íslandi. Í fuglunum fundust margar gerðir veira sem eiga bæði uppruna til Evrópu og Ameríku. Rannsóknirnar leiddu meðal annars í ljós að Ísland er eins konar suðupottur fyrir fuglaflensur frá mismunandi heimssvæðum þar sem þær blandast og mynda nýjar gerðir veira. Ljóst er að Ísland getur virkað eins og stökkpallur fyrir fuglaflensur á milli Evrasíu og Ameríku. Í rannsóknunum fundust m.a. vægar gerðir af H5N1 (í vaðfugli) og H5N2 (í máfi) fuglaflensuveirum.