Ný rafeindasmásjá gangsett á Læknagarði
Ný rafeindasmásjá var formlega tekin í gagnið þriðjudaginn 8. september 2015 við hátíðlega athöfn í Lífvísindasetri Háskóla Íslands í Læknagarði. Tækið hefur mikla þýðingu fyrir hvers kyns rannsóknir á frumum.
Fjöldi manns var viðstaddur athöfnina. Að loknu stuttum ávörpum frá prófessorunum Hannesi Petersen og Eiríki Steingrímssyni, sem báðir starfa við Lífvísindasetur, og kynningu á tækinu frá bæði Helgu Ögmundsdóttur prófessor og Jóhanni Arnfinnssyni, verkefnastjóra og kennara við Læknadeild, kom það í hlut Jóns Atla Benediktssonar, rektors Háskóla Íslands, að gangsetja tækið.
Rafeindasásjáin verður nýtt í hvers kyns rannsóknir á innri gerð frumna, þar með talið baktería. Tækið mun ekki aðeins nýtast vísindamönnum Lífvísindaseturs heldur einnig vísindamönnum hjá Matís og á Tilraunastöð Háskóla Íslands í meinafræði að Keldum, m.a. við rannsóknir á örverum.