Með fróðleik í fararnesti: Stjörnu- og norðurljósaganga
Sævar Helgi Bragason, verkefnisstjóri við Háskóla Íslands og kennari í Háskóla unga fólksins og Háskólalestinni, svaraði spurningum um norðurljósin, stjörnurnar og vetrarbrautina í gönguferð laugardaginn 17. janúar 2015 sem helguð var himingeimnum. Farið var að Elliðabænum við Elliðavatn og gengið meðfram vatninu, og himingeimurinn skoðaður með berum augum og sjónaukum. Góð þátttaka var í ferðinni.
Ferðin var farin í samstarfi við Ferðafélag barnanna. Ferðin var liður í samstarfi Háskóla Íslands og Ferðafélags Íslands um göngu- og hjólaferðir undir yfirskriftinni „Með fróðleik í fararnesti“ sem hófst á aldarafmælisári skólans árið 2011. Reynsla og þekking fararstjóra Ferðafélagsins og þekking kennara og vísindamanna háskólans blandast saman í áhugaverðum ferðum um höfuðborgarsvæðið og næsta nágrenni þess. Markmiðið með samstarfinu er að vekja áhuga almennings á fræðslu og hollri útivist og fjölga valkostum í þeim efnum. Um leið er vakin athygli og vonandi áhugi á fjölbreyttri starfsemi háskólans og Ferðafélagsins.