Danski geimfarinn Andreas Mogensen
Daninn Andreas Mogensen flutti erindi um geimferðir og för sína í Alþjóðlegu geimstöðina í Hátíðasal föstudaginn 18. mars 2016.
Mogensen varð árið 2015 fyrstur Dana til þess að ferðast til Alþjóðlegu geimstöðvarinnar. Evrópska geimferðastofnunin (ESA) valdi hann til þátttöku í geimferðaáætlun sinni árið 2009 og eftir áralanga þjálfun hélt hann loks í geimstöðina 2. september 2015 um borð í Soyuz TMA-18. Mogensen dvaldi tíu daga í geimstöðinni við ýmis verkefni.
Mogensen var staddur hér á landi á vegum kvikmyndagerðarmanna sem unnu að heimildamyndinni Tilgangur lífsins í leikstjórn Portúgalans Miguel Gonçalves Mendes, en þess má geta að tónlistarmaðurinn Hilmar Örn Hilmarsson kom þar einnig við sögu.
Í fyrirlestrinum fjallaði Mogensen um geimferðir og ferð sína í Alþjóðlegu geimstöðina en jafnframt gafst gestum færi á að spyrja hann um förina.