Úthlutun úr Sjóði Sigríðar Lárusdóttur
6. október 2016 voru tveir styrkir veittir til rannsókna á sviði bæklunarlækninga með áherslu á stoðkerfissjúkdóma úr Sjóði Sigríðar Lárusdóttur. Styrkhafar voru Kristín Briem, prófessor við námsbraut í sjúkraþjálfun, og Halldór Jónsson jr., prófessor og sérfræðingur í bæklunarskurðlækningum.
Rannsókn Halldórs Jónssonar jr. prófessors felst í að koma á fót klínísku matskerfi fyrir sjúklinga sem eru búnir að gangast undir heildarmjaðmarliðaskipti. Að rannsókninni standa Halldór Jónsson jr., yfirlæknir á bæklunarskurðdeild Landspítala og prófessor við Læknadeild, Gígja Magnúsdóttir, sjúkraþjálfari á Grensásdeild Landspítala, og Paolo Gargiulo, doktor í heilbrigðisverkfræði og forseti heilbrigðisverkfræðideildar Háskólans í Reykjavík. Rannsóknin er unnin í samvinnu við Tækniháskólann í Vín í Austurríki (Technische Universität Wien) og Háskólann í Napóli á Ítalíu (Università degli Studi di Napoli Federico II).
Rannsókn Kristínar Briem prófessors er framhald á stærri rannsókn þar sem metin er útbreiðsla og orsakir ákveðinna alvarlegra hnémeiðsla og skurðaðgerðir þeim tengdar. Markmiðið er að meta áhrif þessara meiðsla á þróun slitgigtar í burðarliðum (hnjám og mjöðmum). Rannsóknin er unnin í samstarfi við Arnþór Guðjónsson og Einfríði Árnadóttur, sérfræðinga í myndgreiningu, og Micah Nicholls, doktorsnema við Læknadeild.
Tilgangur Sjóðs Sigríðar Lárusdóttur við Háskóla Íslands er að efla rannsóknir á sviði bæklunarlækninga. Sérstök áhersla er lögð á rannsóknir á meðfæddum göllum í mjaðmarlið, svo sem ættgengi, tíðni og afleiðingum. Sjóðinn stofnaði Sigríður Lárusdóttir (f. 5. maí 1918) árið 2005 til minningar um þá sem hafa glímt við meðfædda sjúkdóma í mjöðm en Sigríður átti við þann sjúkdóm að stríða frá fæðingu.