Vísindasýning í Háskólabíói
Sprengjugengi Háskóla Íslands ásamt EuroScienceFun og Háskóla Íslands bauð til vísindasýningarinnar "ShowScience 2016" í Háskólabíói laugardaginn 9. apríl 2016.
Sprengjugengið hefur á undanförnum árum haldið efnafræðisýningar með það að markmiði að ýta undir áhuga ungmenna á efnafræði og raunvísindum almennt. Ýmsir sambærilegir hópar eru starfandi í hinum stóra heimi. EuroScienceFun (ESF) er evrópskt samstarfsverkefni sem Sprengjugengið er aðili að og hefur þann tilgang að mynda tengsl milli þessara hópa.
Á hinni árlegu ráðstefnu ESF koma sýningarhópar víðsvegar að í landi þess sýningarhóps sem hýsir ráðstefnuna hverju sinni og að þessu sinni var Sprengjugengi Háskóla Íslands gestgjafinn. Ráðstefnan stóð yfir í fimm daga og á lokadegi hennar héldu allir sameiginlega vísindasýningu sem var opin almenningi. 20 sýningarteymi komu saman í Háskólabíó og sýndu stórskemmtilegar tilraunir.
Vísindasmiðjan var einnig opin og StjörnuSævar var á svæðinu.
Verkefnið var styrkt af Mennta- og menningarmálaráðuneytinu, Háskóla Íslands, Medor, Ísaga og Efnafræðifélagi Íslands.