Fræði og fjölmenning - Sýrlenskir flóttamenn í Evrópu
Sýrland var viðfangsefni þriðja fundar í fundaröð Háskóla Íslands, Fræði og fjölmenning, sem að þessu sinni var haldinn í samstarfi við íslenska utanríkisráðuneytið og fulltrúa frá alþjóðlegu frjálsu félagasamtökunum Norwegian Refugee Council (NRC).
Jón Atli Benediktsson rektor setti fundinn. Eygló Harðardóttir félags- og húsnæðismálaráðherra greindi frá viðbrögðum íslenskra stjórnvalda við óöldinni í Sýrlandi og áskorunum vegna aukins straums flóttamanna frá stríðshrjáðum svæðum til Evrópu. Martin Hartberg, sérfræðingur í málefnum Mið-Austurlanda hjá NRC, greindi frá stöðu mála í Sýrlandi, áhrifum átakanna í Evrópu og starfsemi NRC í tengslum við þau. Arvinn E. Gadgil, yfirmaður samstarfs- og stefnumáladeildar hjá NRC, greindi frá viðbrögðum Norðmanna við ástandinu í Sýrlandi og umræðum þar um stöðuna í Evrópu. Hann fjallaði sérstaklega um opinbera umræðu í Noregi og framlög til málaflokksins í fjárlögum norskra stjórnvalda. Auðbjörg Halldórsdóttir, forsvarsmaður Íslensku friðargæslunnar, fjallaði um framlag Íslands til neyðar- og mannúðarmála er tengjast ástandinu í Sýrlandi.