Nemendur Háskóla Íslands styrktir til sumarnáms við Stanford
Sumarið 2016 hlutu tveir grunnnemar við Háskóla Íslands styrk til sumarnáms við Stanford-háskóla í Bandaríkjunum, í svonefnt Stanford Summer International Honors Program (SSIHP). Sumarnámið við Stanford nær yfir átta vikur og þar taka nemendur námskeið sem þeir fá metin til eininga í námi sínu.
Þeir nemendur sem hlutu að þessu sinni styrk til námsins, frá Stanford og Háskóla Íslands, voru Esther Hallsdóttir, nemi í mannfræði, og Ísak Einar Rúnarsson, nemi í hagfræði. Auk þeirra héldu sjö aðrir nemendur úr ýmsum deildum Háskóla Íslands til sumarnámsins í Stanford. Þetta var sjötta árið sem nemendur Háskóla Íslands fengu þetta einstæða tækifæri við þennan víðkunna háskóla og hafa fyrri þátttakendur borið mikið lof á námið.
Stanford-háskóli í Kaliforníu er einn fremsti háskóli heims og býður upp á nám á breiðu sviði. Það er ótvírætt mikill fengur að samstarfi Stanford og Háskóla Íslands en samningur milli skólanna var undirritaður 2010.