Háskóli unga fólksins fær viðurkenningu Siðmenntar
Háskóli unga fólksins hlaut Fræðslu- og vísindaviðurkenningu Siðmenntar 2016. Háskóli unga fólksins hefur verið starfræktur hvert sumar frá árinu 2004 þar sem fróðleiksfús börn á aldrinum 12-16 ára hafa komið í nokkra daga og lagt stund á hin ýmsu fræði. Námskeiðin sem hafa verið kennd við Háskóla unga fólksins skipta hundruðum og brautskráðir nemendur skólans eru nú hátt í 3000.
Þórunn Ólafsdóttir og Akkeri hlutu hina árlegu Húmanistaviðurkenningu sem Siðmennt veitir. Þórunn og Akkeri hafa unnið gríðarlega mikilvægt og óeigingjarnt starf í þágu flóttamanna, bæði hér á landi og erlendis.
Siðmennt veitti þremur aðilum styrki árið 2016. Málefni flóttamanna voru Siðmennt sérlega hugleikin að þessu sinni og veitti félagið stuðning til flóttabarna í Sýrlandi að upphæð kr. 350.000 með milligöngu Unicef, barnahjálpar Sameinuðu þjóðanna, og Akkeri hlaut 150.000 krónur fyrir störf í þágu flóttafólks. Einnig var styrkur að upphæð 100.000 kr. veittur Tabú, sem er femínísk hreyfing þar sem sjónum er beint að margþættri mismunun gagnvart fötluðu fólki.