Hin árlega Japanshátíð var haldin á Háskólatorgi laugardaginn 31. janúar 2015. Þetta var í ellefta sinn sem hátíðin er haldin. Sem fyrr stóð námsbraut í japönsku máli og menningu við Hugvísindasvið Háskóla Íslands að hátíðinni ásamt sendiráði Japans á Íslandi og höfðu bæði nemendur í japönsku við Háskóla Íslands og samfélag Japana á Íslandi unnið hörðum höndum að undirbúningi í aðdraganda hátíðarinnar.

Gestum á Japanshátíð bauðst m.a. að smakka japanskan mat, fá nafn sitt ritað á japönsku, kynnast japanskri tungu á sérstökum tungumálabás ásamt því að skoða glæsilega Ikebana-blómaskreytingu. Enn fremur gátu gestir kynnt sér japanska list og listmuni ásamt leikjum og spreytt sig á bæði origami og manga-teikningu.

Japönsk dægurmenning skipaði einnig veglegan sess á hátíðinni, þar á meðal heimildarmyndir, anime- og manga-teiknimyndir ásamt kvikmyndum og sjónvarpsþáttum frá Japan. Enn fremur var kynning á japanskri dægurtónlist (J-pop) og hljómsveit spilaði lög úr þekktum Anime-teiknimyndum ásamt hefðbundinni japanskri tónlist. Jafnframt stigu sérfræðingar í japanskri bardagalist á stokk og sýndu listir sínar.

Einn af hápunktum Japanshátíðarinnar líkt og fyrri ár var svokölluð Cosplay-búningakeppni en þar klæðast keppendur búningum byggðum á frægum persónum úr japönskum teiknimyndum. Almennar upplýsingar um nám í japönsku, hina ýmsu skólastyrki og skiptinám við japanska háskóla voru aðgengilegar á hátíðinni en auk þess gátu gestir kynnt sér Íslensk-japanska félagið og Félag Japansmenntaðra á Íslandi.