Fréttatilkynning:
Þýskubíllinn (12.07.2005)

Þann 13. júlí 2005 eða 331 degi fyrir heimsmeistarakeppnina í knattspyrnu 2006 var flautað til leiks með Þýskubílnum. Verkefnið Þýskubíllinn var kynnt á blaðamannafundi í húsakynnum KSÍ að viðstöddum frú Vigdísi Finnbogadóttur, fyrrverandi forseta Íslands og Eyjólfi Sverrissyni, áður atvinnumanni hjá Hertha BSC Berlín og fulltrúum yngri kynslóðarinnar. Þýskubíllinn er samstarfsverkefni þýska sendiráðsins á Íslandi, Félags þýzkukennara og Stofnun Vigdísar Finnbogadóttur í erlendum tungumálum og Háskóla Íslands. Bíllinn sjálfur er sportjeppi af gerðinni Porsche Cayenne og mun aka um Ísland með upplýsingar um heimsmeistaramótið sem haldið verður í 12 borgum í Þýskalandi. Jafnframt verður boðið upp á örnámskeið í fótboltaþýsku. Starfsmaður verkefnisins – þýskuþjálfarinn – Kristian Wiegand er kostaður af Robert Bosch-stofnuninni og Würth-stofnuninni sem báðar eru í sambandsríkinu Baden-Württemberg. Tilkynnt var um framlag þeirra til verkefnisins á ráðstefnu sem haldin var í tilefni af 75 ára afmæli Vigdísar Finnbogadóttur þann 14. apríl sl.

Íþróttafélög, æskulýðsfélög og skólar um allt land geta fengið Þýskubílinn í heimsókn. Áætlaðar eru þrjár hringferðir um landið 2005-2006 og hefst sú fyrsta í september nk. Þangað til geta allir þeir sem vilja fá Þýskubílinn í heimsókn pantað bílinn og tekur ferðaáætlun hans mið af þeim óskum. Þýskubíllinn verður með stórt fótboltaspjald (Torwand) í farteskinu fyrir þá sem vilja láta reyna á skotfimi sína.
Verkefnið er á vegum Stofnunar Vigdísar Finnbogadóttur í erlendum tungumálum og er Oddný G. Sverrisdóttir, dósent í þýsku, verkefnisstjóri. Heimasíða Þýskubílsins er www.þýskubíllinn.hi.is eða www.deutschmobil.hi.is og unnt er senda tölvupóst á netfangið tyskubillinn@hi.is.